M-WEB HELP DOWES OM TE LEER OP DIE NET
Rapport - Navorsing aan die Universiteit van die Witwatersrand dui daarop dat sowat
3,5% van Suid-Afrika se bevolking in meerdere of mindere mate gehoorverlies ondervind.
Dowes is dus die grootste groep gestremdes in Suid-Afrika. M-Web, Suid-Afrika se voorste
verskaffer van internetdienste, reik nou na hierdie gemeenskap uit deur spesifieke kursusse
aan dowe onderwysers te bied. Dit vind by die e-Sentrum in Kaapstad plaas. Dit is die
eerste keer dat die dowes in Suid-Afrika die geleentheid gebied word om die internet
op 'n gestruktureerde manier te leer gebruik. Dit beloof om 'n hele nuwe dimensie
aan die onderrig van dowe kinders te verleen. Die e-Sentrum in Hofstraat, Kaapstad
is een van die drie sentrums wat deur M-Web en Media24 bedryf word. Al drie (Calitzdorp,
Carnarvon en Kaapstad) word aangewend as onderrigsentrums waar leerlinge, onderwysers en
ouers toegerus word om die internet as leer- en onderrighulpmiddel te benut. Die
driedaagse kursus wat deur M-Web Leerhulp se span opvoedkunde-spesialiste ontwerp is,
het ten doel om dit maklik te maak om die internet as onderrig-hulpmiddel aan te wend.
Dit is in die besonder van nut vir dowes, aangesien dit 'n visuele en nie 'n klankgerigte
medium is nie. Tans word die kursus aan onderwysers van die Dowe Federasie van die Wes-Kaap
gebied. Dit sal gefasiliteer word deur ervare opleiers by die e-Sentrum, voormalige
onderwysgegradueerdes en vingertaaltolke. Afgesien van die inhoud en vakkundige hulp
wat die e-Sentrum aan M-Web Leerhulp verleen, ontwikkel die sentrum reeds meer as 18
maande lank formele opleiding in die gebruik van die internet as kurrikulum-hulpmiddel.
Me. Louise Malherbe, bemarkingsbestuurder van M-Web, sê die internet hou uitstekende
voordele vir die dowe gemeenskap in. 'Bo en behalwe die voor die hand liggende toegang
wat dit bied tot diepgrondige inligting oor 'n reeks onderwerpe, is dit een van die
platforms waarop die dowes op 'n absolute gelyke voet kan meeding en deelneem. In die
loop van die eerste dag van opleiding het dit duidelik geword dat dowe onderwysers besonder goed op die internet presteer. 'Hulle is baie meer visueel
geletterd, en snap veel gouer as vorige opleidingsgroepe waar en wat die vinnigste kortpaadjies
na inligting is.' M-Web lewer die omvattendste inhoud vir aanlyn-leerlinge in Suid-Afrika.
Dit bied uitgebreide internetbronne vir kinders, onderwysers en ouers.
AANVAAR ONS, ONS WIL KERK NIE SKEUR; GEWESE PREDIKANTSVROU PLEIT BY NG SINODE OOR GAYS:
Beeld koerant - Dis agt maande sedert sy aan die gemeente erken het sy is gay. Kort
daarna het sy uit die pastorie getrek en is sy deur baie mense verstoot. Vandag kan me.
Grethie Coetzee (34), voorheen predikantsvrou van die NG gemeente Vanderbijlpark-Suid, sê
sy het 'die weg van die waarheid gekies'. 'Ek kon nie langer met die leuen saamleef nie,' het
Coetzee die naweek vertel op 'n konferensie oor homoseksualiteit by die NG kerk Driehoek in
Vanderbijlpark op die vooraand van die sitting vandeesweek van die algemene sinode van
die NG Kerk. Homoseksualiteit is een van die brandende kwessies wat op die sitting te
berde gebring gaan word. Coetzee het gesê baie mense dink om gay te wees, is 'n sonde,
'n vloek wat God oor jou uitgespreek het. 'Ek het ook met dié idee grootgeword. Ek wil
nie die Here se eer skade doen nie, maar Hy het my só gemaak. Hoe kan dit sonde wees?'
Coetzee en haar man, ds. Eon Coetzee, was vanjaar 13 jaar getroud. Hulle het drie
seuntjies. In Maart het sy besluit om die huwelik te beëindig en die 'weg van die
eensames' te volg. Sy het vertel sy het aanvanklik by die Here gepleit om haar te
verander, maar ná maande van gebed ervaar sy nou 'n onbeskryflike bevryding en het
sy haar onvoorwaardelik aanvaar. Vir die eerste keer in haar lewe is sy werklik gelukkig.
Maar sy is steeds seer oor die gesin wat sy moes agterlaat. Haar man was goed vir haar.
En sy weet hy het haar steeds innig lief, maar die leemte in haar binneste het net
groter geword. Hy kon dit nie vul nie. Coetzee het vertel sy het dag en nag die Here
gevra om van haar 'n goeie vrou vir haar man te maak, 'n goeie ma vir haar kinders
en 'n goeie predikantsvrou. 'Hierdie onnoembare, onlogiese hunkering in my het net al
hoe sterker geword.' Sy het berading gekry. Sy het selfmoord oorweeg omdat sy geglo
het in Die Bybel staan duidelik dat homoseksuele met klippe doodgegooi moet word.
Die gedagte aan haar seuntjies het haar van selfmoord laat afsien. Sy vertel sy was
verskeur en het 'n dubbele lewe begin lei. 'Die konflik tussen dít wat ek is en dít wat ek behoort te wees, was soms ondraaglik. Ek weet nie
waarom ek ooit getroud is nie. Ek is steeds lief vir my gewese man, maar dis soos
vir 'n baie spesiale vriend.' Sy het later met haar man oor hierdie 'vreemde gevoelens
teenoor ander vroue' gepraat. Hulle het dit met hul kinders bespreek dat sy 'anders' is
en dat sy die huis sou verlaat. Sy krimp steeds ineen by die gedagte aan die aand toe
een van haar seuntjies gevra het: 'Mammie, gaan jy nou hel toe?' 'Ek voel ek is deur
die kerk mislei deurdat Die Bybel verkeerd geinterpreteer word. Nêrens word eksplisiet
genoem dat homoseksualiteit sonde is nie. Dit weet ek vandag, ná ure en dae se
Bybelstudie en leeswerk. 'Die kerk en die sinode wat 'n besluit oor ons moet neem, is
in 'n dilemma. Ek verstaan dit. Maar ek vra: asseblief, as dit moontlik is, aanvaar
ons in die kerk. Nie een van ons wil graag die kerk sien skeur nie. Miskien is dit
dan beter om maar liewer die finale besluit oor ons uit te stel. 'Miskien sal die
kerk ook oor 'n dekade sê: `Jammer ons het julle verstoot', soos hy vandag jammer
sê oor apartheid, rassisme en slawerny. Dit kon ook alles uit die Skrif regverdig
word. As ek kon verander, sou ek. Wie sal uit vrye wil kies om gay te wees as dit
soveel makliker is om by jou gesin te bly?'
BEWYSE VAN JESUS SE BROER GEVIND; VONDS VAN HOUER MET INSKRIPSIE 'N EERSTE;
Beeld - Koerant - 'n Inskripsie op 'n 2 000 jaar oue beendere houer van kalksteen wat
onlangs in Israel gevind is, lyk of dit die oudste argeologiese bewys is dat Jesus van
Nasaret geleef het. Jakobus, seun van Josef, broer van Jesus, lui die inskripsie en
volgens mnr. André Lemaire, 'n Franse akademikus, dateer die kalksteenhouer van drie
dekades ná die kruisiging. Die woorde is in antieke Aramees. Hoewel al drie name
algemeen was in die antieke tyd, is die kombinasie van die drie name baie spesifiek,
skryf Lemaire. Jakobus word in die Nuwe Testament genoem as familie van Jesus. Jakobus
is ook die skrywer van die brief aan die 12 stamme van Israel wat in Die Bybel opgeneem
is. Lemaire beskou dit as 'n outentieke verwysing na Jesus van Nasaret.
Tot voor dié ontdekking is geen artefak van die eerste eeu nog gevind wat aan Jesus
gekoppel kan word nie. Hoewel daar vrae bly, glo Lemaire die kalksteenhouer en inskripsie is eg.
Die Jode het van 20 v.C. tot 70 n.C. ossuariums (houers waarin dooies se bene geplaas is)
gebruik. Die houer is sowat 'n halfmeter lank. Volgens Lemaire was dit ongewoon om die
pa en broer van die oorledene te noem. Daar is net een ander voorbeeld van dié gebruik
in Aramees. Dit beteken dat die spesifieke broer, Jesus, baie belangrik of bekend was
inderdaad die geval met Jesus Christus. Twee wetenskaplikes van Israel het die oppervlak
en die inskripsie in mikroskopiese besonderhede bestudeer en gesê daar is geen bewys
dat dit nie outentiek is nie. Die eienaar van die beenderehouer wil nie sy naam bekend
gemaak hê nie en ook nie waar dit bewaar word nie. Hy het nooit die potensiële waarde
daarvan besef voordat Lemaire dit nie bestudeer het nie. Die eienaar is nie van plan
om dit in die openbaar ten toon te stel nie, want hy wil nie die koste aan die
versekering en beskerming daarvan hê nie. Sapa-AP
DIE ALGEMENE SINODE VAN DIE NG KERK HET BESLUIT OM SY TYDSKRIFTEMAATSKAPPY (TM)
UIT DIE KLOUE VAN BANKROTSKAP TE RED;
Beeld - Koerant - Die Algemene Jeugkommissie het R1,5 miljoen hiervoor aangebied en die
Christelike Lektuurfonds R500 000. Volgens ds. Christo Alheit, lid van die kommissie wat
die TM ondersoek het, kan die TM binne sewe dae knak as die kerk nie iets doen nie.
Hy het aan die algemene sinode gesê die TM skuld Absa R1,3 miljoen en toon 'n bedryfsverlies
van R700 000. Boonop het die sirkulasie gedaal en adverteerders die hasepad gekies.
Presies hoe die saak gehanteer gaan word om TM te red, moet nou deur kundiges uitgewerk
word. Dié besluite is geneem ná 'n gespanne bespreking waarin kritiek op dr. Frits Gaum,
uitvoerende hoof van die TM, en die direksie uitgespreek is. Gaum het gesê die afgelope
ses maande sedert die eerste berigte oor probleme in die TM in Rapport verskyn het, was
vir hom 'n 'slopende ervaring'. Hy het erken hy het foute begaan en verskoning gevra.
Hy het gesê hy aanvaar die bevindings van die ondersoekkommissie na die kerklike
media wat deur die algemene sinodale kommissie aangestel is. Wat hy moeilik aanvaar,
is dat kerkmense hom by koerante verkla het sonder om eers met hom daaroor te praat.
Só maak kerkmense nie met mekaar nie. Dan is mense nie meer broers en susters nie,
maar vyande, het hy gesê. Hy het die vergadering verlaat nadat hy klaar gepraat het
en die bespreking en besluitneming is in sy afwesigheid afgehandel.
Die sinode het die bevinding aanvaar dat daar nie korrupsie, oneerlikheid, doelbewuste
wanbestuur of roekeloosheid in die TM was nie. Daar is besluit dat daar wel ondeurdagte
besluite was en dat die bestuur nie genoeg rekening gehou het met finansiële en
bestuurskundige werklikhede nie. Die sinode het ook sy voorbehoud uitgespreek oor
transaksies van belastingstrukturering wat blykbaar heeltemal wettig was, maar waar
daar tog sprake van misleiding was.
NG KERK STEL UIT OOR GAY-SEKSUALITEIT:
Beeld - Koerant - Homoseksuele lidmate van die NG Kerk sal tot die kerk se volgende
algemene sinode moet wag om te hoor watter standpunt die kerk oor hul seksualiteit
inneem. Die algemene sinode het gister erken dat daar in die kerk ernstige meningsverskil
is oor die standpunt oor homoseksualiteit wat die kerk in 1986 ingeneem het. Daarvolgens
is 'n homoseksuele oriëntasie nie sonde nie, maar die uitlewing daarvan wel. Die sinode
het gevra dat 'n omvattende studie oor homoseksualiteit gedoen word. Kundiges, maar ook
gay gelowiges en gelowiges wat bely dat hulle deur God van homoseksualiteit bevry is,
moet daarby betrek word. Terselfdertyd het die sinode teenoor gays bely dat die kerk
in die verlede met veroordeling en liefdeloosheid gehelp het om hulle te vervreem.
Die sinode verklaar dat hy nie die integriteit van medegelowiges in twyfel trek bloot
op grond van hul seksuele oriëntasie nie.
Die kerk wil hulle verseker van sy pastorale bewoënheid en hulle verseker dat hulle
welkom is in die kerk. Daarmee saam het die sinode 'sonder miskenning van die feit
dat daar in die samelewing verhoudings bestaan en tot stand kom tussen lede van
dieselfde geslag' die standpunt gehandhaaf dat 'n huwelik net deur 'n man en vrou
gesluit kan word. Homo- en heteroseksuele losbandigheid is ook ten sterkste veroordeel.
Die sinode het gevra dat homoseksuele mense in afwagting van die volgende algemene
sinode se besluit 'in die styl en gesindheid van Jesus Christus' aanvaar word.
